لفظ احسان اپنے عام لغوی معنی سے بہت بلند تر ہے، بلکہ تمام اعمال سے بلند ہے، عالی ہمت افراد کا مطمح نظر ہے،اورایمان و اسلام کے بعد اس کا تیسرا مقام ہے ، ایمان و اسلام سے الگ ہٹ کر نہیں بلکہ ان دونوں کا جزو لا ینفک ہے، اسلام کے بغیر ایمان قابل قبول نہیں ،اور ایمان کے بغیر احسان قابل قبول نہیں.

عدل کا مقصد یہ ہے کہ وہ حکومت میں صدر مقام پر فائز ہو، اور وہ عدل(جس کوقائم کرنے یا اس کے قیام کی کوشش کرنے کا اللہ نے حکم دیا ہے) ان تمام کاموں اور باتوں سے زیادہ اہم ہیں جن کے لئے امت مسلمہ کوشاں ہے.

اے بنت اسلام! تمہارے ایمان کا ہار شرک جلی اور شرک خفی کی زد میں آ کر بکھر جائے گا ، اور تمہارا شعلۂ ایمان بجھ کر راکھ کا ڈھیر بن جائے گا اگر تمہارے خیالات قلبی و نفسانی اور تمہاری عبادت جسمانی اس نورانی دھاگے سے منسلک نہیں ہیں جو تاریکیوں کو روشن کرتا ہے اور تمہیں مقام بہیمی سے نکال کر صفات ملکوتی تک پہونچاتا ہے۔

اسلام ایک مکمل دین اور مستقل تہذیب بن کر آیا ہے،اس کے اندر زمانہ کو بدلنے کی صلاحیت ہے،اس کا ہدف انسان، سماج اور دنیا ہے،سلوک و تربیت اقتحام العقبۃ (دشواریوں کو عبور کر کے اللہ تک پہونچنے) کا نام ہے ، رکاوٹوں کو عبور کرنے سے مراد یہ ہے بندہ مشتاقانہ اللہ کی جانب بڑھے،اور مجاہد جماعت اللہ کے وعدوں پر یقین رکھتے ہوئے کفرو باطل اور ظلم کے علاقوں میں گھستی چلی جائے ، اس کا یہ چلنا صدق و اخلاص،جوش جہاد، صبر واستقامت سے معمور ہو.